நாட்டு மக்களுக்கு தீபாவளி வாழ்த்துக் கூறிய ‘சுனிதா வில்லியம்ஸ்’

விண்வெளி மையத்தில் இருந்து நாட்டு மக்களுக்கு தீபாவளி வாழ்த்துகளை சுனிதா வில்லியம்ஸ் தெரிவித்துள்ளார்.

நாடு முழுவதும் தீபாவளி பண்டிகை கொண்டாட்டங்கள் கலை கட்டி வருகின்றன. குறிப்பாக அமெரிக்க அதிபர் மாளிகை உட்பட உலகம் முழுவதிலும் தீபாவளி பண்டிகை கொண்டாடப்பட்டு வருகிறது. இந்நிலையில், உலகம் மட்டுமின்றி விண்வெளியிலிருந்தும் தீபாவளி வாழ்த்து வந்துள்ளது.

நாசா திட்டத்தில் கடந்த ஜூன் மாதம் விண்வெளிக்கு அனுப்பப்பட்ட சுனிதா வில்லியம்ஸ் தொழில்நுட்ப சிக்கல் காரணமாக பூமிக்கு திரும்ப முடியாத நிலை ஏற்பட்டது. அடுத்த ஆண்டு பிப்ரவரி மாதமே அவர் பூமிக்கு திரும்ப வாய்ப்புள்ளதாகக் கூறப்படுகிறது. நாசாவின் திட்டத்தில் விண்வெளிக்கு அனுப்பப்பட்ட இந்தியாவைச் சேர்ந்த சுனிதா வில்லியம்ஸ் சர்வதேச விண்வெளி மையத்திலிருந்து அனைவர்க்கும் தீபாவளி வாழ்த்து தெரிவித்துள்ளார்.

இது தொடர்பாக அவர் வெளியிட்டுள்ள காணொளிப் பதிவில்,

” வெள்ளை மாளிகையிலும் உலகம் முழுவதிலும் தீபாவளி கொண்டாடும் அனைவருக்கும் எனது வாழ்த்துகள். இந்த ஆண்டு விண்வெளி மையத்தில் இருந்து தீபாவளி கொண்டாடும் அரிய வாய்ப்பு எனக்குக் கிடைத்துள்ளது. எனது தந்தை தீபாவளி உள்ளிட்ட பிற இந்திய பண்டிகைகளைப் பற்றி எடுத்துரைத்து இந்திய கலாச்சாரத்தோடு என்னை நெருக்கத்தில் வைத்திருந்தார்”

இவ்வாறு அவர் தெரிவித்தார்.