தமிழ்நாட்டிற்கு காவேரி நீர் கிடையாது – கர்நாடகா துணை முதல்வர் டி.கே. சிவக்குமார்..!

தமிழகத்திற்கு காவிரி நீரை திறப்பது மிக மிக கடினம் என்று கூறிய கர்நாடகா துணை முதல்வர் டி.கே. சிவக்குமார், இந்த விவகாரம் தொடர்பாக உச்ச நீதிமன்றத்தையும், காவிரி மேலாண்மை ஆணையத்தையும் சந்திக்க தயாராக இருப்பதாகவும் தெரிவித்தார்.

காவிரி நீருக்காக தமிழகத்தின் டெல்டா மாவட்டமே காத்துக் கொண்டிருக்கும் நிலையில், காவிரி நீரை திறந்துவிடுவது மிக மிக கடினம் என்று கர்நாடகா துணை முதல்வர் டி.கே. சிவக்குமார் கூறியிருப்பது விவசாயிகளை பதைபதைக்க செய்துள்ளது.

காவிரி மேலாண்மை ஆணையம், உச்ச நீதிமன்றம் ஆகியவற்றின் உத்தரவுகளை காற்றில் பறக்கவிட்டுள்ள கர்நாடகா, தமிழகத்திற்கு காவிரியில் இருந்து வழங்க வேண்டிய தண்ணீரை தர மறுத்து வருகிறது.

இதனால் சாகுபடிக்காக காத்திருக்கும் லட்சக்கணக்கிலான ஏக்கர் பயிர்கள் வாடும் நிலை ஏற்பட்டுள்ளது. ஒருவேளை, அப்படி ஏதும் நடந்தால் ஆயிரக்கணக்கான டெல்டா விவசாயிகள் மிக மோசமான நஷ்டத்தை சந்திப்பார்கள். பல விவசாயிகளின் வாழ்வாதாரமே போய்விடும்.

இப்படிப்பட்ட இக்கட்டான சூழலில்தான், தண்ணீர் தர மறுத்து ஆட்டம் காட்டி வருகிறது கர்நாடகா அரசு. இதனிடையே, இந்த விஷயத்தில் தலையிட்ட காவிரி நீர் ஒழுங்காற்று வாரியம், தமிழகத்திற்கு வினாடிக்கு 5000 கன அடி நீரை திறந்துவிடுமாறு உத்தரவிட்டது. ஆனால், இந்த உத்தரவையும் கர்நாடகா அரசு மதிக்கவில்லை. இந்நிலையில், கர்நாடகா துணை முதல்வர் டி.கே. சிவக்குமார், இன்று டெல்லிக்கு மத்திய நீர்வளத்துறை அமைச்சர் கஜேந்திர சிங் ஷெகாவத்தை சந்தித்து பேசினார். அப்போது, தமிழகத்திற்கு தண்ணீர் திறந்துவிடுமாறு கர்நாடகாவை நிர்பந்திக்கக் கூடாது என டி.கே. சிவக்குமார் கோரிக்கை விடுத்தார்.

இந்நிலையில், தற்போது செய்தியாளர்களை சந்தித்த டி.கே. சிவக்குமார், “தமிழ்நாட்டிற்கு காவிரியில் இருந்து தண்ணீர் திறந்துவிடுவது மிக மிக கடினம். இது தொடர்பாக அமைச்சரிடம் எங்கள் நிலைப்பாட்டை கூறினேன். காவிரி மேலாண்மை ஆணையத்தையும், உச்ச நீதிமன்றத்தையும் எதிர்கொள்ள தயாராக இருக்கிறோம். மத்திய குழுவிடமும் எங்கள் தரப்பு தரவுகளை சமர்ப்பித்துள்ளோம்” என்றார். காவிரி மேலாண்மை ஆணையத்தின் அவசரக்கூட்டம் வரும் 18-ம் தேதி நடைபெறவுள்ளது குறிப்பிடத்தக்கது.