20 மில்லியன் பார்வைகளைக் கடந்தது தமன்னாவின் ‘காவாலா’  பாடல் வீடியோ

சூப்பர் ஸ்டார் ரஜினிகாந்த் நடிப்பில் நெல்சன் திலீப்குமார் இயக்கத்தில் உருவாகி வரும் படம் ‘ஜெயிலர்’. எந்திரன், பேட்ட, அண்ணாத்த படங்களைத் தொடர்ந்து சூப்பர் ஸ்டார் ரஜினிகாந்த் நடிக்க, சன் பிக்சர்ஸ் தயாரிக்கும் நான்காவது படம் இது.
பான் இந்தியா வெளியீடாகத் தயாராகியுள்ள இந்தப் படத்தில் மோகன்லால், ஜாக்கி ஷெராப், சிவராஜ்குமார், சுனில் என பிற மொழிகளைச் சேர்ந்த முன்னணி நட்சத்திரங்கள் நடித்துள்ளனர்.

கதாநாயகியாக தமன்னா நடிக்க, முக்கிய வேடங்களில் ரம்யா கிருஷ்ணன், விநாயகன், மிர்னா மேனன், வசந்த் ரவி, நாகபாபு, யோகி பாபு உள்ளிட்ட பலர் நடித்துள்ளனர்.
பேட்ட, தர்பார் என சூப்பர் ஸ்டார் ரஜினியின் முந்தைய இரண்டு படங்களில் ஹிட் பாடல்களைக் கொடுத்த அனிருத் இந்தப் படத்திற்கு இசையமைப்பதன் மூலம் மூன்றாவது முறையாக அவருடன் இணைந்துள்ளார்.  
ஆகஸ்ட் 10ஆம் தேதி ‘ஜெயிலர்’ திரைப்படம் வெளியாக இருக்கிறது. இந்த நிலையில் கடந்த ஜூன் 6ஆம் தேதி மாலை இந்தப் படத்தில் இருந்து ‘காவாலா’ என்கிற பாடல் வெளியானது. வெளியாகி மூன்று நாட்களே ஆன நிலையில் கிட்டத்தட்ட 20 மில்லியன் பார்வையாளர்கள் யூட்யூப்பில் பார்த்து ரசித்துள்ளனர்.

அது மட்டுமல்ல, spotify-யில் இந்தப் பாடல் ஒரு மில்லியனுக்கும் அதிகமான ஸ்ட்ரீம்களைப் பெற்றுள்ளது.
அனிருத்தின் அதிரடி இசை, அருண்ராஜா காமராஜின் பாடல் வரிகள், பாடகி ஷில்பா ராவின் காந்தக் குரல், தமன்னாவின் நளினமான நடனம், சூப்பர் ஸ்டார் ரஜினியின் சிக்னேச்சர் ஸ்டைல், ஜானி மாஸ்டரின் நடன வடிவமைப்பு என எல்லாமாகச் சேர்ந்து இந்தப் பாடலுக்கு ரசிகர்களிடம் மிகப்பெரிய வரவேற்பைப் பெற்றுத் தந்துள்ளது.

தமன்னா ரசிகர்களும் படக்குழுவினரும் மகிழ்ச்சியில் மிதக்கின்றனர்.