ஆர்.ஜே.பாலாஜியின் ‘ஹேப்பி எண்டிங்’ டைட்டில் டீசர் வெளியானது..!

ஆர்.ஜே.பாலாஜி நடிக்கும் ‘ஹேப்பி எண்டிங்’ திரைப்படத்தின் டைட்டில் டீசர் வெளியாகியுள்ளது.

ஆர்.ஜே.வாக இருந்து ‘தீயா வேலை செய்யணும் குமாரு’ படத்தின் மூலம் நடிகராக அறிமுகமானவர் ஆர்.ஜே.பாலாஜி. இவர் மூக்குத்தி அம்மன், வீட்ல விசேஷம் ஆகிய படங்களை இயக்கியுள்ளார். அடுத்து ‘மூக்குத்தி அம்மன் 2’ படத்தை இவர் இயக்குவார் என கூறப்பட்ட நிலையில், அந்தப் படத்தை சுந்தர்.சி இயக்குவதாக அதிகாரப்பூர்வமாக அறிவிக்கப்பட்டது. இதற்கிடையே, ஆர்.ஜே.பாலாஜி நடிகர் சூர்யாவை வைத்து படம் இயக்கவுள்ளார்.

ஆர்.ஜே பாலாஜி நடிப்பில் கடைசியாக வெளியான ‘சிங்கப்பூர் சலூன்’ திரைப்படம் ரசிகர்கள் மத்தியில் கலவையான விமர்சனங்களை பெற்றது. இதைத்தொடர்ந்து ஆர்.ஜே பாலாஜி ‘ஹேப்பி எண்டிங்’ என்ற திரைப்படத்தில் கதாநாயகனாக நடிக்கவுள்ளார். இப்படத்தை அறிமுக இயக்குனர் அம்மாமுத்து சூர்யா இயக்கவுள்ளார். இப்படத்திற்கு ஷான் ரோல்டன் இசையமைக்கவுள்ளார்.

இப்படத்தை குட் நைட், லவ்வர் போன்ற வெற்றி படங்களை தயாரித்த மில்லியன் டாலர் ஸ்டூடியோஸ் தயாரிக்கவுள்ளது. இந்த நிலையில், இப்படத்தின் டைட்டில் டீசர் வெளியாகியுள்ளது. டைட்டில் டீசரின் காட்சிகள் பாலாஜி அவரது காதல் தோல்வி கதைகளை கூறுமாறு அமைந்துள்ளது. இத்திரைப்படம் அடுத்தாண்டு கோடை விடுமுறைக்கு வெளியாகவுள்ளது.