தனுஷ் இயக்கி, நடிக்கும் ‘இட்லி கடை’ படத்தின் ரிலீஸ் தேதி அறிவிப்பு..!

தனுஷ் இயக்கி, நடிக்கும் இட்லி கடை திரைப்படம் அடுத்த ஆண்டு ஏப்ரல் மாதம் 10-ம் தேதி வெளியாகும் என படக்குழு அறிவித்துள்ளது.

கடந்த 2017-ம் ஆண்டு வெளி வந்த ‘பா. பாண்டி’ திரைப்படத்தின் மூலம் நடிகர் தனுஷ் இயக்குநராக அறிமுகமானார். தொடர்ந்து தனுஷின் இயக்கத்தில் இரண்டாவது உருவான திரைப்படம் ‘ராயன்’. தனுஷின் 50-வது படமாக ‘ராயன்’ திரைப்படம் உருவானது. இதையடுத்து, ‘நிலவுக்கு என்மேல் என்னடி கோபம்’ என்ற திரைப்படத்தையும் தனுஷ் இயக்கி வருகிறார். அதே நேரத்தில், ‘குபேரா’ என்ற படத்தில் தனுஷ் நடித்து வருகிறார்.

தனுஷ் தனது 52வது படத்தை தானே இயக்கி நடித்து வருகிறார். இது தனுஷ் இயக்கும் 4வது படமாகும். இத்திரைப்படத்தை டாவ்ன் பிக்சர்ஸ் தயாரிக்கிறது. இப்படத்திற்கு ஜி.வி.பிரகாஷ் இசையமைக்கிறார். இத்திரைப்படத்திற்கு ‘இட்லி கடை’ என பெயரிடப்பட்டுள்ளது. இதில், நித்யா மேனன், அருண்விஜய், ராஜ்கிரண் ஆகியோர் முக்கிய கதாபாத்திரங்களில் நடிக்கின்றனர். இத்திரைப்படத்தின் படப்பிடிப்பு விறுவிறுப்பாக நடைபெற்று வருகிறது.

இந்நிலையில், இப்படத்தின் அடுத்த அப்டேட் ஒன்று வெளியாகி உள்ளது. அதன்படி, இப்படத்தின் ரிலீஸ் தேதியை படக்குழு வெளியிட்டுள்ளது. ‘இட்லி கடை’ திரைப்படம் அடுத்த ஆண்டு ஏப்ரல் மாதம் 10-ம் தேதி உலகம் முழுவதும் வெளியாக உள்ளதாக படக்குழு அறிவித்துள்ளது.