கமல்ஹாசன் பிறந்தநாளை முன்னிட்டு ‘தக் லைஃப்’ படத்தின் டீசர் வெளியானது..!

இன்று கமல்ஹாசன் பிறந்தநாளை முன்னிட்டு ‘தக் லைஃப்’ படத்தின் டீசர் வெளியாகியுள்ளது.

நாயகன் படத்திற்கு பிறகு கிட்டத்தட்ட 35 ஆண்டுகள் கழித்து கமல்ஹாசன் – மணிரத்னம் மீண்டும் கைகோர்த்துள்ள படம் ‘தக் லைஃப்’. படத்தின் டைட்டில் வீடியோ வெளியான நாள் முதலே மக்கள் மத்தியில் படத்திற்கான எதிர்பார்ப்பு எகிறத் தொடங்கியது. இந்தப் படத்தில் கமலுடன் சிம்பு, பங்கஜ் திரிபாதி, அலி பைசல், அசோக் செல்வன், ஜோஜு ஜார்ஜ், நாசர், திரிஷா, அபிராமி, ஐஸ்வர்ய லட்சுமி, சானியா மல்ஹோத்ரா உள்ளிட்டோர் இடம் பெற்றுள்ளனர். முன்னதாக இந்தப் படத்தில் ஜெயம் ரவி, துல்கர் சல்மான் நடிப்பார்கள் என்று அறிவிப்பு வெளியானது. பின்னர் சில காரணங்களுக்காக அவர்கள் இந்தப் படத்தில் இருந்து விலகினர். ‘தக் லைஃப்’ படத்துக்கு ஏ.ஆர். ரகுமான் இசையமைத்துள்ளார். ஒளிப்பதிவு ரவி கே சந்திரன், எடிட்டிங் ஸ்ரீகர் பிரசாத். கடந்த ஆண்டு அக்டோபர் மாதம் பூஜையுடன் ஆரம்பிக்கப்பட்ட இந்தப் படத்தின் ஷூட்டிங் சமீபத்தில் நிறைவு பெற்று.

தற்போது போஸ்ட் புரொடக்ஷன் பணிகள் விறுவிறுப்பாக நடைபெற்று வருகிறது. இன்னும் சில வாரங்களில் முழுப் பணிகளும் நிறைவு பெற்று படம் இந்த ஆண்டு இறுதியில் அல்லது 2025 பொங்கலுக்கு வெளியாகலாம் என்ற செய்திகள் வெளியானது.

இந்நிலையில், இன்று கமல்ஹாசன் பிறந்தநாளை முன்னிட்டு ‘தக் லைஃப்’ படத்தின் டீசர் வெளியாகியுள்ளது.  அதுமட்டுமில்லாமல் படத்தின் ரிலீஸ் தேதியையும் படக்குழு வெளியிட்டுள்ளது.

“விண்வெளி நாயகா.. விடியல் வீரா” என்ற டயலாக் இடம்பெற, ஏ.ஆர்.ரஹ்மானின் பின்னணி இசையுடன் அதிரடி ஆக்ஷன் காட்சிகளை கொண்டு காண்போரை மிரட்டியுள்ளது படத்தின் டீசர். சிம்பு மற்றும் கமல்ஹாசன் அசத்தல் ஆக்ஷன் காட்சிகளும் இந்த டீசரில் இடம்பெற்றுள்ளது.

மேலும், அடுத்த வருடம் படம் ஜூன் மாதம் 5ம் தேதி உலகெங்கிலும் உள்ள திரையரங்குகளில் வெளியாகவுள்ளது.

டீசர் வெளியான சில மணி நேரத்திலேயே லட்சத்துக்கும் மேலான பார்வையாளர்களை குவித்துள்ளது. மணிரத்னம் கமல்ஹாசன் இருவரும் திரையில் செய்யப்போகும் மாயாஜாலத்தை பார்க்க ரசிகர்கள் பலரும் ‘தக் லைஃப்’ ரிலீசுக்காக காத்திருக்கின்றனர்.