போராசை பெருநஷ்டம்! லியோ ட்ரைலர் சிறப்பு காட்சியாம்! ரோஹினி திரையரங்க பரிதாபங்கள்! | தனுஜா ஜெயராமன்

சென்னை ரோகிணி திரையரங்கில் லியோ படத்தின் டிரெய்லர் வெளியீடு கொண்டாட்டத்தின் போது, ரசிகர்கள் திரையரங்கில் இருந்த இருக்கைகளை உடைத்துள்ள சம்பவம் அனைவருக்கும் அதிர்ச்சியை ஏற்படுத்தியுள்ளது. திரையரங்கில் உள்ள அனைத்து இருக்கைகளும் சேதமடைந்துள்ளது வீடியோவில் தெரியவந்தது. இது சமூக வளைதளங்களில் வைரலாகி வருகிறது.

லியோ டிரெய்லர் நேற்று வெளியாகி ரசிகர்கள் மத்தியில் மிகுந்த வரவேற்பைப் பெற்று, சமூக வலைத்தளங்களில் டிரெண்டிங்கில் இருந்து வருகிறது.

இயக்குநர் லோகேஷ் கனகராஜ் இயக்கத்தில் விஜய் நடித்துள்ள திரைப்படம் ‘லியோ’. மாஸ்டர் படத்திற்கு பிறகு மீண்டும் விஜய், லோகேஷ் கனகராஜ் கூட்டணி இணைந்துள்ளதால், இப்படத்திற்கு மிகப் பெரிய எதிர்பார்ப்பு ஏற்பட்டுள்ளது. இப்படத்தில் த்ரிஷா, அர்ஜுன், கௌதம் மேனன், சஞ்சய் தத், மன்சூர் அலிகான், மிஷ்கின் உள்ளிட்டோர் நடித்துள்ளனர். மேலும் இசையமைப்பாளர் அனிருத் இசை அமைத்துள்ளார்.

லியோ டிரெய்லர் வெளியீட்டுக்காக தமிழகம் முழுவதும் உள்ள சில திரைப்படங்களில் ரசிகர்கள் கொண்டாட்ட நிகழ்ச்சிக்கு ஏற்பாடு செய்யப்பட்டு இருந்தது. அதேபோல் சென்னை ரோகிணி திரையரங்கமும் ரசிகர்களுக்காக சிறப்பு காட்சியாக ட்ரெயிலரை வெளியிட்டது.

படத்தின் டிரெய்லரை கண்டு ஆடிப்பாடி கொண்டாடிய ரசிகர்கள், திரையரங்கின் இருக்கைகள் அனைத்தையும் முற்றிலும் சேதப்படுத்திய வீடியோக்களும், தற்போது சமூக வலைத்தளங்களில் வெளியாகி வைரலாகி வருகிறது. விஜய் ரசிகர்களின் இந்த செயலுக்கு பல்வேறு தரப்பினரும் சமூக வலைத்தளங்களில் கண்டனங்களை பதிவிட்டு வருகின்றனர்.

மேலும் சிலர் காவல்துறை அனுமதி மறுத்த நிலையிலும், திரையரங்கில் டிரெய்லர் வெளியிட்ட ரோகிணி திரையரங்கு நிர்வாகத்தை பலரும
கண்டித்துள்ளனர் . இதை போன்ற செயல்கள் தேவையற்ற பிரச்னையை உண்டாக்கும் என்றும் தெரிவித்து வருகின்றனர்.