முன்​னாள் பிரதமர் ‘மன்மோகன் சிங்’ காலமானார்.

முன்​னாள் பிரதமர் மன்மோகன் சிங் நேற்று இரவு காலமானார். இந்தியா​வின் 14-வது பிரதமராக பதவி வகித்த மன்மோகன்​சிங் (92) கடந்த 1932 செப்​.26-ல் மேற்கு பஞ்சாபில் (தற்​போது பாகிஸ்​தானில் உள்ளது) பிறந்​தவர். காங்​கிரஸ் மூத்த தலைவர்​களில் ஒருவரான இவர் கடந்த 1991-96 நரசிம்​ம​ராவ் தலைமையிலான அமைச்​சர​வை​யில் நிதி அமைச்​சராக பதவி வகித்​தார். பொருளாதார வல்லுநரான இவர் இந்தியா​வின் பொருளாதார தாராளமய​மாக்கல் கொள்​கை​யின் தொடக்​கத்​துக்கு வித்திட்டவர். ரிசர்வ் வங்கி​யின் ஆளுநராக​வும் பதவி வகித்​தார்.

காங்​கிரஸ் தலைமையிலான ஐக்கிய முற்​போக்கு கூட்டணி அரசில் 2004 மே மாதம் முதல் 2014 மே மாதம் வரை என தொடர்ந்து 2 முறை பிரதமராக பதவி வகித்​தார். மன்மோகன் சிங்​குக்கு ஏற்கெனவே இதயநோய் உள்ளதாக கூறப்படுகிறது. இந்த நிலை​யில், நேற்று (டிச.26) இரவு அவருக்கு திடீரென மூச்​சுத்​திணறல் ஏற்பட்​டது. அதனுடன் அவர் நினை​விழந்து மயக்​க​மும் அடைந்தார். இதையடுத்து, அவர் டெல்லி எய்ம்ஸ் மருத்​துவ​மனை​யில் சேர்க்​கப்​பட்​டார்.

அங்கு அவருக்கு தீவிர சிகிச்சை பிரி​வில் தொடர்ந்து சிகிச்சை அளிக்​கப்​பட்டு வந்தது. அவரது உடல்​நிலை மிகவும் கவலைக்​கிடமாக இருந்து வருவதாக மருத்​துவமனை வட்டாரங்கள் தெரி​வித்தன. அவரை காண காங்​கிரஸ் கட்சி​யின் மூத்த தலைவர்கள் திரண்டு வந்த வண்ணம் இருந்​தனர்.

மத்திய அமைச்சர் நட்டா​வும் எய்ம்ஸ் மருத்​துவ​மனைக்கு விரைந்து அவருக்கு அளிக்​கப்​படும் சிகிச்சை குறித்து கேட்​டறிந்​தார். இதற்​கிடையே, எய்ம்ஸ் மருத்​துவமனை வளாகத்​தில் துணை ராணுவப்படை குவிக்​கப்​பட்டு பாது​காப்பு ஏற்பாடுகள் பலப்​படுத்​தப்​பட்டன. இந்நிலை​யில், மருத்துவ குழு​வினர் தீவிர சிகிச்சை அளித்​தும் பலனின்றி மன்மோகன் சிங் நேற்று இரவு காலமானார்.