யுபி யோத்தாஸை வீழ்த்தி ‘தமிழ் தலைவாஸ்’ வெற்றி..!

புரோ கபடி லீக் போட்டியின் நேற்றைய ஆட்டத்தில் யுபி யோத்தாஸை வீழ்த்தி தமிழ் தலைவாஸ் அணி அபார வெற்றி பெற்றது.

11-வது புரோ கபடி லீக் போட்டி ஹைதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த தொடரின் முதற்கட்ட லீக் ஆட்டங்கள் ஹைதராபாத்தில் நடந்து முடிந்தன. இதனையடுத்து தொடரின் 2வது கட்ட லீக் ஆட்டங்கள் நொய்டாவில் நடைபெற்று வருகின்றன. இந்த நிலையில், இந்த தொடரில் நேற்று (நவ.26) நடைபெற்ற முதல் லீக் ஆட்டத்தில் தமிழ் தலைவாஸ் – யுபி யோத்தாஸ் அணிகள் மோதின.

இந்த ஆட்டத்தில் தமிழ் தலைவாஸ் அணி தொடக்கம் முதல் சிறப்பாக ஆடி ஆதிக்கம் செலுத்தியது. இறுதியில் 40-26 என்ற புள்ளிக்கணக்கில் யுபி யோத்தாஸ் அணியை வீழ்த்தி தமிழ் தலைவாஸ் அணி அபார வெற்றி பெற்றது. தொடர்ந்து நடைபெற்ற 2வது ஆட்டத்தில் தபாங் டெல்லி – பைரைட்ஸ் அணிகள் மோதிக்கொண்டன. விறுவிறுப்பாக நடைபெற்ற இந்த ஆட்டத்தில் 39 -39 என்ற புள்ளிக்கணக்கில் ஆட்டம் டிரா ஆனது.