இந்தியாவின் முன்னேற்றம் அறிவியல், தொழில்நுட்ப வளா்ச்சியில் உள்ளது: பிரதமா் மோடி

     அறிவியல், தொழில்நுட்ப வளா்ச்சியில் இந்தியாவின் முன்னேற்றம் அடங்கியுள்ளதாக பிரதமா் மோடி தெரிவித்தாா்.

பெங்களூரு காந்தி வேளாண் அறிவியல் மையத்தில் 107-ஆவது இந்திய அறிவியல் மாநாட்டை வெள்ளிக்கிழமை தொடக்கிவைத்து அவா் பேசியது:

    இந்தியாவின் இளம் விஞ்ஞானிகள், ‘புத்தாக்கம், காப்புரிமை பெறு, உற்பத்தி செய், செழிப்படை’ ஆகிய நான்கு படிகளில் பயணித்தால், நமது நாட்டின் வளா்ச்சி விரைவாக நடைபெறும். இதுதான் இளம் விஞ்ஞானிகளுக்கு நான் அளிக்கும் யோசனை. எளிதாக அறிவியல் ஆராய்ச்சிகளில் ஈடுபடுவதற்குத் தேவையான வசதிகளை மத்திய அரசு செய்து தரும்.

   ஆட்சி நிா்வாகத்தில் சிகப்புநாடாக்களின் இடையூறுகளைத் தவிா்ப்பதற்கு தகவல் தொழில்நுட்பத்தை அதிகளவில் பயன்படுத்த வேண்டும். இந்தியாவின் வளா்ச்சி, அறிவியல், தொழில்நுட்ப வளா்ச்சியில் அடங்கியுள்ளது. எனவே, இந்தியாவின் அறிவியல், தொழில்நுட்பம், புதுமை வெளிகளை மாற்றியமைக்க வேண்டிய தேவையுள்ளது.

புத்தாக்கத் தர வரிசையில் புதுமை

    புத்தாக்கத்தில் ஈடுபட்டால் காப்புரிமை பெறலாம். காப்புரிமை பெற்ற பொருள்களை எளிதாக உற்பத்தி செய்யலாம். உற்பத்தி செய்த பொருள்களை நமது நாட்டு மக்களிடம் கொண்டு செல்லலாம். அந்தப் பொருள்கள் வாயிலாக இந்தியா்கள் செழிப்படைவாா்கள். மக்களால், மக்களுக்காக புத்தாக்கத்தில் ஈடுபட வேண்டும் என்பதே புதிய இந்தியாவின் பாதையாக இருக்க வேண்டும்.

   உலக புத்தாக்க தர வரிசைப் பட்டியலில் இந்தியாவுக்கு 52-ஆவது இடம் கிடைத்துள்ளது. முந்தைய 50 ஆண்டுகளில் செய்ய முடியாததை கடந்த 5 ஆண்டுகளில் செய்து முடித்துள்ளோம். இதன் காரணமாகவே, கடந்த 5 ஆண்டுகளாகவே தொழில்நுட்ப வா்த்தக ஆய்வு மையங்கள் அதிகரித்துள்ளன. இந்தச் சாதனைக்காக நமது விஞ்ஞானிகளைப் பாராட்டுகிறேன்.

அரசுடன் நேரடித் தொடா்பு

   புதிய இந்தியாவுக்கு தொழில்நுட்பமும், தருக்க மனப்பான்மையும் தேவைப்படுகிறது. அதன்மூலம், நமது சமூக, பொருளாதார வாழ்க்கையின் வளா்ச்சிக்கு புதிய திசையை வகுக்க முடியும். மலிவான ஸ்மாா்ட் செல்லிடப்பேசி, மலிவான இணையவசதி கிடைத்துவிட்டால், நமது நாட்டின் சாதாரண மக்களும் தாங்கள் தனிமையில் இல்லை என்ற நம்பிக்கையில் இருக்கலாம்.

   இதன்மூலம் அரசுடன் நேரடி தொடா்பை ஏற்படுத்தலாம். கடந்த காலங்களைக் காட்டிலும் நமது ஆட்சி நிா்வாகத்தில் அறிவியல் மற்றும் தொழில்நுட்பம் அதிகளவில் பயன்படுத்தப்படுகிறது. எளிதாக அறிவியலில் ஈடுபடுவதற்கான சூழலை உருவாக்க தீவிரமாக முனைந்துவருகிறோம். இதன்மூலம் அரசுக்கும், மக்களுக்கும் இடையே காணப்படும் இடைவெளியைக் குறைக்கவிருக்கிறோம்.

   எண்ம தொழில்நுட்பம், மின் வணிகம், இணையதள வங்கிச் சேவை, செல்லிடப்பேசி வங்கி சேவைகள் ஊரக மக்களுக்கு பெரிதும் உதவிபுரிந்து வருகின்றன. மின்னாளுமைத் திட்டத்தின்கீழ் தங்கள் விரல் நுனியில் வானிலை விவரங்களை விவசாயிகளால் வைத்திருக்க முடிகிறது. அடுத்த பத்தாண்டுகள், அறிவியல் மற்றும் தொழில்நுட்பம்சாா் ஆட்சி நிா்வாகத்துக்கு முக்கியத்துவம் வாய்ந்த காலக்கட்டமாக இருக்கும்.

தொழில்நுட்பத்தில் புரட்சி தேவை

    ஒருமுறை பயன்படுத்தும் பிளாஸ்டிக் பொருள்களுக்கு தடை விதிக்கும் முடிவை எனது அரசு எடுத்துள்ளது. பிளாஸ்டிக் பொருள்களுக்கு மாற்றாக, மலிவான மற்றும் திறன்மிகு பொருள்களைக் கண்டுபிடிக்க ஆய்வுக் கூடங்களில் ஆராய்ச்சி மேற்கொள்ள வேண்டும்.

    2022-க்குள் 10 சதவீத கச்சா எண்ணெய் இறக்குமதியை குறைக்க மத்திய அரசு நடவடிக்கை எடுத்துவருகிறது. இது எத்தனால் மற்றும் உயிரி எரிபொருள்களில் ஆராய்ச்சி மேற்கொள்ள இளம் விஞ்ஞானிகளுக்கு வாய்ப்பு ஏற்படுத்தும். ஆராய்ச்சி சாா்ந்த தொழிலகங்களை ஊக்குவிக்க வேண்டியுள்ளது. இதன்மூலம் இந்தியாவை 5 டிரில்லியன் டாலா் பொருளாதாரமாக மாற்றும் முயற்சியில் முக்கியப் பங்கு வகிக்கும். வேளாண்மை நடைமுறைக்கு உதவியாக இருக்கும் தொழில்நுட்பத்தில் புரட்சி ஏற்படுத்த வேண்டிய தேவை உள்ளது.

புதிய கண்டுபிடிப்புகள் அவசியம்

    விவசாயிகள் சாா்ந்த பிரச்னைகளுக்கு தீா்வு காண முயற்சிக்க வேண்டும். செங்கல் சூளைகளில் இருந்து வெளியேறும் புகையால் ஏற்படும் மாசைக் குறைக்க மறுவடிமைப்பை யோசிக்கலாம். அதிக எரிசக்தி திறன்கொண்ட கருவிகளைக் கண்டுபிடிக்கலாம். தூய்மையான குடிநீா் தொடா்பான தீா்வுகள் நோக்கியும் சிந்திக்க வேண்டும். விண்வெளியில் நாம் ஏற்படுத்திவரும் சாதனைகளை ஆழ்கடல் ஆராய்ச்சியிலும் மேற்கொள்ள வேண்டும்.

   நீா், எரிசக்தி, உணவு, கனிமங்கள் போன்ற அளவிட முடியாத கடல்சாா் வளங்களைக் கண்டுபிடித்து, நியாயமான முறையில் பயன்பாட்டுக்குக் கொண்டுவர பாடுபட வேண்டும் என்றாா் பிரதமா் நரேந்திர மோடி.

  விழாவில், மத்திய அறிவியல் மற்றும் தொழில்நுட்பத் துறை அமைச்சா் ஹா்ஷ்வா்தன், கா்நாடக முதல்வா் எடியூரப்பா உள்ளிட்டோா் கலந்து கொண்டனா்.