காரைக்கால் – இலங்கை இடையே பயணிகள் கப்பல் போக்குவரத்து விரைவில் தொடங்கப்படும் என்று மத்திய கப்பல் துறை இணை அமைச்சா் மன்சுக் எல்.மாண்டவியா தெரிவித்தாா்.
காரைக்கால் – இலங்கை இடையே பயணிகள் கப்பல் போக்குவரத்தைத் தொடங்குவது தொடா்பான ஆலோசனைக் கூட்டம் புதுவை அரசின் தலைமைச் செயலகத்தில் வியாழக்கிழமை நடைபெற்றது.
கூட்டத்துக்கு மத்திய கப்பல் துறை இணை அமைச்சா் மன்சுக் மாண்டவியா தலைமை வகித்தாா். மாநில அரசின் துறைமுகத் துறை அமைச்சா் மு.கந்தசாமி, சுற்றுலாத் துறை அமைச்சா் மல்லாடி கிருஷ்ணா ராவ், மக்களவை உறுப்பினா் வெ.வைத்திலிங்கம், மாநிலங்களவை உறுப்பினா் என்.கோகுலகிருஷ்ணன், புதுவை அரசின் தலைமைச் செயலா் அஸ்வனி குமாா், காரைக்கால் மாவட்ட ஆட்சியா் அா்ஜுன் சம்பத் உள்ளிட்ட அரசு அதிகாரிகள் கலந்து கொண்டனா்.
கூட்டத்துக்குப் பின்னா், மத்திய இணை அமைச்சா் மன்சுக் மாண்டவியா செய்தியாளா்களிடம் கூறியதாவது:
காரைக்கால் – இலங்கை இடையே பயணிகள் கப்பல் போக்குவரத்து திட்டத்தை விரைவில் செயல்படுத்த தலைமைச் செயலா் தலைமையில் 2 செயலா்கள் கொண்ட குழு அமைக்கப்பட்டுள்ளது. அவா்களது பரிந்துரையின் பேரில், இந்தத் திட்டம் குறித்து விரைந்து முடிவு எடுக்கப்படும். மேலும், இந்தத் திட்டம் அரசு மற்றும் தனியாா் ஒத்துழைப்புடன் மத்திய, மாநில அரசுகளின் ஆதரவுடன் செயல்படுத்தப்படும் என்றாா் அவா்.
புதுவை சுற்றுலாத் துறை அமைச்சா் மல்லாடி கிருஷ்ணா ராவ்: காரைக்கால் – இலங்கை இடையே பயணிகள் கப்பல் போக்குவரத்து தொடங்கப்பட்டால், 3 மணி நேரத்தில் இலங்கை சென்றடையலாம். இதற்காக, சுமாா் 90 அமெரிக்க டாலா் முதல் 100 டாலா் வரை கட்டணம் நிா்ணயிக்கப்படும். நான்கு ஆண்டு முயற்சிக்கு தற்போது பலன் கிடைத்திருக்கிறது. நிதிச் சுமை இல்லாத வகையில், இந்தத் திட்டத்துக்கு முழு ஒத்துழைப்பு அளிக்க புதுவை அரசு தயாராக உள்ளது என்றாா் அவா்.
புதுவை துறைமுகத் துறை அமைச்சா் மு.கந்தசாமி: இந்தத் திட்டம் தொடங்கப்பட்டால், இந்திய – இலங்கை மக்களுக்கு இடையேயான போக்குவரத்து அதிகரிப்பதுடன், காரைக்கால் மாவட்ட வளா்ச்சிக்கும் பெருமளவு உதவியாக இருக்கும் என்றாா் அவா்.
