“நிறைவடைந்தது ‘லியோ’ படத்தின் படப்பிடிப்பு..!”

சமீபத்தில் தளபதி விஜய், ‘லியோ’ படத்தின் படப்பிடிப்பை முடித்த நிலையில், தற்போது ஒட்டு மொத்த படப்பிடிப்பும் முடிவடைந்து விட்டதாக தன்னுடைய குழுவுடன் எடுத்துக் கொண்ட புகைப்படத்தை வெளியிட்டு அறிவித்துள்ளார் இயக்குனர் லோகேஷ் கனகராஜ். இயக்குனர் லோகேஷ் கனகராஜ், உலக நாயகன் கமல்ஹாசனை வைத்து இயக்கி இருந்த ‘விக்ரம்’ திரைப்படம் ரூ.150 கோடி பட்ஜெட்டில் எடுக்கப்பட்டு, சுமார் ரூ.450 கோடிக்கு மேல் வசூல் சாதனை செய்தது. 100 நாட்களுக்கு மேல், திரையரங்கில் ஓடிய இந்த படத்தைத் தொடர்ந்து, ‘மாஸ்டர்’ படத்தின் வெற்றிக்கு பின்னர் மீண்டும் தளபதி விஜய்யை வைத்து ‘லியோ’ படத்தை இயக்க உள்ளதை உறுதி செய்தார் லோகேஷ் கனகராஜ்.

மிகப்பெரிய எதிர்பார்ப்புக்கு மத்தியில், கடந்த ஜனவரி மாதம் ‘லியோ’ படத்தின் படப்பிடிப்பு துவங்கிய நிலையில், முதல் கட்ட படப்பிடிப்பு காஷ்மீரில் சுமார் 50 நாட்களுக்கு மேல் எடுக்கப்பட்டது. இதில் லியோ படத்தில் விஜய்க்கு கதாநாயகியாக நடித்து வரும் திரிஷா, சஞ்சய் தத், மிஷ்கின், ஆக்சன் கிங் அர்ஜூன், கதிர், ஜனனி, ப்ரியா ஆனந்த் உள்ளிட்ட பலர் கலந்து கொண்டனர். பல்வேறு இடங்களில் ‘லியோ’ படத்தின் படப்பிடிப்பு எடுக்கப்பட்ட நிலையில், இறுதி கட்ட படப்பிடிப்பு சென்னையில் உள்ள பிரபல ஸ்டுடியோ ஒன்றில் பிரம்மாண்ட செட் போட்டு எடுக்கப்பட்டு வந்தது. கடந்த வாரம் விஜய் தன்னுடைய படப்பிடிப்பை முடித்து விட்டார் என, விஜய்யுடன் எடுத்துக்கொண்ட புகைப்படத்தை வெளியிட்டு அறிவித்தார் இயக்குனர் லோகேஷ் கனகராஜ்.

6 மாதங்களாக நடைபெற்ற ‘லியோ’ படத்தின் படப்பிடிப்பு நிறைவு பெற்றுள்ளதாக இயக்குநர் லோகேஷ் கனகராஜ் தெரிவித்துள்ளார். படத்தில் அனுராக் காஷ்யப் நடிக்க உள்ளதாக கூறப்படுகிறது. மேலும் தனுஷ் சிறப்பு தோற்றத்தில் தோன்ற உள்ளதாக அதிகாரபூர்வ தகவல்கள் பரவி வந்தன. அண்மையில் வெளியான படத்தின் ‘நாரெடி தான் வரவா’ பாடல் ரசிகர்களிடையே நல்ல வரவேற்பை பெற்றது. காஷ்மீர், சென்னை உள்ளிட்ட பல்வேறு பகுதிகளில் படப்பிடிப்பு நடைபெற்று வந்த நிலையில் ஒட்டுமொத்த படப்பிடிப்பும் நிறைவடைந்துள்ளதாக படக்குழு அதிகாரபூர்வமாக அறிவித்துள்ளது. சமீபத்தில் விஜய் தொடர்பான காட்சிகளின் படப்பிடிப்பு நிறைவடைந்த நிலையில், இதைத்தொடர்ந்து, இன்னும் சில தினங்களில் ‘லியோ’ படத்தின் ஒட்டுமொத்த படப்பிடிப்பும் நிறைவடைய உள்ளதாகவும் தகவல் வெளியானது.

இன்று அனைத்து படப்பிடிப்பும் முடிந்தது என லோகேஷ் கனகராஜ் தெரிவித்துள்ளார். இதுதொடர்பாக தனது ட்விட்டரில், “6 மாதங்களில் 125 நாட்கள் படப்பிடிப்பு! இந்தப் படத்தில் தங்கள் ஆன்மாவை ஈடுபடுத்திக் கொண்ட நடிகர்கள் மற்றும் படக் குழுவினருக்கு நன்றி. இந்தப் பயணம் மீண்டும் என் இதயத்துக்கும் தனிப்பட்ட வகையில் மிகவும் நெருக்கமானதாக இருந்தது” என்று குறிப்பிட்டுள்ளார். படம் வரும் அக்டோபர் 19-ம் தேதி திரையரங்குகளில் வெளியாக உள்ளது குறிப்பிடத்தக்கது. படப்பிடிப்பு முடிவடைந்துவிட்டதால் அடுத்ததாக பட குழுவினர் போஸ்ட் புரோடக்ஷம் பணிகளில் முழு கவனம் செலுத்த உள்ளனர். மேலும் படத்தின் படப்பிடிப்பு முடிவடைவதற்கு முன்பாகவே லியோ படத்தின் டிஜிட்டல் உரிமம், சாட்டிலைட் உரிமம், தமிழக ரிலீஸ் உரிமை, ஆகியவை பல கோடிக்கு விற்பனை செய்யப்பட்டுள்ளது. இந்த படத்திற்கு அனிருத் இசை அமைக்க மனோஜ் பரமசிம்கா ஒளிப்பதிவு செய்துள்ளார். பிலோமின் ராஜ் படத்தொகுப்பு பணிகளை மேற்கொண்டுள்ளார் என்பது குறிப்பிடத்தக்கது.