கடந்த நிதியாண்டில், சென்னை மாநகராட்சி ரூ.2,025 கோடி சொத்து வரி வசூலித்துள்ளது. மாநகராட்சி வரலாற்றிலேயே ரூ.2,000 கோடிக்கு மேல் சொத்து வரி வசூலிக்கப்பட்டது இது முதன்முறை ஆகும்.
கடந்த நிதியாண்டில், சென்னை மாநகராட்சி ரூ.2,025 கோடி சொத்து வரி வசூலித்துள்ளது. மாநகராட்சி வரலாற்றிலேயே ரூ.2,000 கோடிக்கு மேல் சொத்து வரி வசூலிக்கப்பட்டது இது முதன்முறை ஆகும்.
சென்னையில் 13 லட்சத்துக்கும் மேற்பட்ட சொத்து உரிமையாளர்கள், அரையாண்டுக்கு ஒருமுறை ஏப்ரல் மற்றும் அக்டோபர் மாதங்களில் சொத்து வரி மாநகராட்சிக்கு செலுத்துகின்றனர்.
2023-24 நிதியாண்டில் ரூ.1,750 கோடி சொத்து வரி வசூலிக்கப்பட்டது. அதே சமயம், 2024-25 நிதியாண்டில் ரூ.2,000 கோடி இலக்காக நிர்ணயிக்கப்பட்டுள்ளது. அந்த இலக்கை எட்டுவதற்கான முயற்சியில், கடந்த ஒரு மாதமாக மாநகராட்சி வரி வசூலிப்பாளர்கள் வீடு வீடாக சென்று வரி வசூல் செய்தனர்.
குடியிருப்பு சங்கங்களின் உதவியுடன், சிறப்பு வரி வசூல் முகாம்களும் நடத்தப்பட்டுள்ளன. கடந்த மார்ச் 29 முதல் 31-ம் தேதி வரை அரசு விடுமுறை நாட்களாக இருந்த போதிலும், சொத்து வரி வசூல் தொடர்ந்து நடைபெறும் என மாநகராட்சி நிர்வாகம் அறிவித்தது. இதன் படி, நள்ளிரவு 12 மணி வரை, மாநகராட்சியின் ரிப்பன் மாளிகையில் உள்ள தலைமை அலுவலகத்தில் மாநகர வருவாய் அலுவலர் பானுசந்திரன் தலைமையில் வரி வசூலிப்புப் பணியில் அதிகாரிகள் ஈடுபட்டனர்.
இந்த ஒருங்கிணைந்த முயற்சியின் படி, நேற்று இரவு 8 மணி வரை கடந்த நிதியாண்டில் மொத்தம் ரூ.2,025 கோடி சொத்து வரி வசூலிக்கப்பட்டுள்ளது. ரூ.2 ஆயிரம் கோடிக்கு மேல் சொத்து வரி வசூலிக்கப்பட்டது மாநகராட்சி வரலாற்றிலேயே இது முதல் முறை. இது, முந்தைய நிதியாண்டை விட ரூ.275 கோடி அதிகமாக உள்ளது.
இதேபோல், ரூ.570 கோடி தொழில் வரி வசூலிக்கப்பட்டுள்ளது. இது முந்தைய நிதியாண்டை விட ரூ.38 கோடி அதிகம். இன்று முதல், முந்தைய நிதியாண்டுகளுக்கான சொத்து வரிக்கு 2 சதவீதம் வட்டி விதிக்கப்படுகிறது.
மேலும் இந்த நிதியாண்டின் முதல் அரையாண்டுக்கான சொத்து வரியை, ஏப்ரல் 30-ம் தேதிக்குள் செலுத்துபவர்களுக்கு 5 சதவீதம், அதிக பட்சமாக ரூ.5,000 வரை தள்ளுபடி வழங்கப்படும் என சென்னை மாநகராட்சி அறிவித்துள்ளது.
