அடி வாங்கும் குடி…. ஆட்டம் காட்டும் பொருளாதாரம்!

பொருளாதார நெருக்கடி ஏற்பட்டுள்ள நிலையில் மதுபானங்கள் விற்பனையிலும் வீழ்ச்சி ஏற்பட்டுள்ளது:

   வெங்காய விலையேற்றம் உள்ளிட்ட காரணங்களால் மக்களிடையே பொருளாதார நெருக்கடி ஏற்பட்டுள்ள நிலையில் மதுபானங்கள் விற்பனையிலும் வீழ்ச்சி ஏற்பட்டுள்ளது.

   ஒருபுறம் இந்தியாவில் பொருளாதார மந்தநிலை நிலவும் சூழலில், மறுபுறம் குடும்பங்களுக்கான மாதாந்திர பட்ஜெட்டில் செலவுகள் அதிகரித்துள்ளன. பொருட்களுக்கான விலையேற்றத்தால் தேவை குறைந்துள்ளது. குறிப்பாக வெங்காயம் உள்ளிட்ட காய்கறிகளின் விலை முன்னெப்போதும் இல்லாத அளவுக்கு உயர்ந்துள்ளது. இதனால் குடும்பங்கள் தங்களது செலவுகளைக் குறைத்து வருகின்றன. மதுபானங்களுக்கான செலவும் கணிசமான அளவில் குறைக்கப்பட்டுள்ளது.

  இதனால் நடப்பு நிதியாண்டில் மதுபான விற்பனையில் மிகப் பெரிய சரிவு ஏற்படும் என்று அத்துறையைச் சேர்ந்த நிறுவனங்கள் கவலை தெரிவித்துள்ளன. டியாகோ நிறுவனத்தின் ஒரு அங்கமான யுனைடட் ஸ்பிரிட்ஸ் லிமிடெட் நிறுவனம் ஜூலை – செப்டம்பர் காலாண்டில் ரூ.7,296 கோடி மட்டுமே வருவாய் ஈட்டியுள்ளது. இது 2.2 சதவீத வளர்ச்சி மட்டுமே. விற்பனை அளவில் ஒரு சதவீத வளர்ச்சி மட்டுமே ஏற்பட்டுள்ளது. 2018ஆம் ஆண்டின் இதே காலத்தில் விற்பனையில் 10.3 சதவீத வளர்ச்சி இருந்ததாக அந்நிறுவனம் கூறியுள்ளது.