நெல்லை, பொதிகை எக்ஸ்பிரஸ்கள் இனி எக்மோர் செல்லாது!

சென்னை எழும்பூர் ரயில் நிலையத்தில் பராமரிப்பு பணிகள் நடைபெறுவதால் இரண்டு மாதங்களுக்கு நெல்லை, பொதிகை எக்ஸ்பிரஸ்கள் தாம்பரம் ரயில் நிலையத்திற்கு வந்து அங்கிருந்தே கிளம்பும் என்று அறிவிக்கப்பட்டுள்ளது

தமிழ்நாட்டின் தென் பகுதியான தூத்துக்குடி, திருநெல்வேலி, கன்னியாகுமரி, தென்காசி மாவட்ட மக்கள் சென்னை செல்ல பெரும்பாலும் ரயில்களைப் பயன்படுத்தும் நிலையில் நெல்லை, பொதிகை எக்ஸ்பிரஸ்கள் எப்போதும் மக்கள் கூட்டத்துடனே காணப்படும்.திருநெல்வேலியிலிருந்து சென்னைக்கும் (ரயில் எண்: 12632) சென்னையிலிருந்து திருநெல்வேலிக்கும் (12631) தினமும் இயக்கப்படுகிறது. அதே போல் பொதிகை எக்ஸ்பிரஸ் செங்கோட்டையிலிருந்து சென்னைக்கும் (ரயில் எண்: 12662), சென்னையிலிருந்து செங்கோட்டைக்கும் (ரயில் எண்: 12661) தினமும் இயக்கப்படுகிறது. சென்னை எழும்பூர் வரை சென்று திரும்பும் இந்த ரயில்கள் அக்டோபர் 10ஆம் தேதி முதல் டிசம்பர் 7ஆம் தேதி வரை இரு மாதங்கள் தாம்பரம் ரயில் நிலையத்திற்கு வந்து திரும்பும் என் அறிவிக்கப்பட்டுள்ளது.

எழும்பூர் ரயில் நிலையத்தில் நடைபெறும் பணிகள் நிறைவடைந்தவுடன் மீண்டும் இந்த ரயில்கள் எழும்பூர் சென்று திரும்பும். முன்னதாக மக்கள் கூட்ட நெரிசலை தவிர்ப்பதற்காக தென் மாவட்டங்களுக்கு தாம்பரத்திலிருந்து ரயில்கள் இயக்கப்பட்டு வருகின்றன.

நாகர்கோவிலில் இருந்து தாம்பரத்துக்கு வாரத்தில் 3 நாட்கள் இயங்கும் விரைவு ரயில் சேவை மார்ச் மாதம் முதல் செயல்படுத்தப்பட்டு வருவது குறிப்பிடத்தக்கது